Almennar upplýsingar um Sumargleðina 2019.


Sumargleðin er viðburður fyrir ungmenni í 8. - 10. bekk. Ungmennum frá öllum landshornum er velkomið að mæta á hátíðina. Sumargleðin er haldin nú í sjötta sinn. Fyrst var hátíðin haldin í júní árið 2014 og hefur verið haldin árlega síðan. Í öll skiptin hefur hátíðin verið í Kaplakrika í Hafnarfirði, og er þar engin breyting á. Skipulagt, nýlegt og stórt húsnæði gerir Kaplakrikann að frábæru samkomuhúsi fyrir mikinn fjölda. Öll árin hefur hátíðin gengið afar vel, án slysa og án allra vandræða. Sumargleðin hefur jafnan fengið frábær viðbrögð ungmenna, listamanna og utanaðkomandi aðila og því hefur hún fest sig sem árlegur liður sem markar upphaf sumarsins.

Markmið skipuleggjenda Sumargleðinnar er að veita ungmennum stórtónleika, líkt og þá sem sjást erlendis þar sem ljósabúnaður og hljóðbúnaður er meiri en sést hefur á flest öllum sambærilegum viðburðum hérlendis. Góð leið til að hefja sumarið og safna saman ungmennum undir öruggt þak.


Hvar og hvenær er Sumargleðin 2019?


    •       10. júní 2019.

    •       Íþróttahús Fimleikafélags Hafnarfjarðar, Kaplakriki, 220 HFJ.

    •       Viðburður hefst stundvíslega klukkan 18:00 og lýkur klukkan 23:15.

    •       Hætt er að hleypa inn í húsið eftir klukkan 20:15. Undanþágur eru veittar, t.d. vegna útskrifta 10.bekkja, æfinga o.s.fv..

    •       Aðrar upplýsingar má finna hér á vefsíðunni.

Á Sumargleðinni koma ávallt fram landsþekktir tónlistarmenn. Nú í ár koma fram: Herra Hnetusmjör, Huginn, Floni, ClubDub, Sprite Zero Klan, Aron Can, Jói Pé og Króli, GDRN, Bríet, DJ Ingi Bauer, DJ Pythons, Basic House Effect og sigurvegari plötusnúðakeppninnar 2019 hjá grunnskólum sem fram fer í maí.


Um miðasölu-ferlið


Miða er hægt að nálgast á vefsíðunni www.sumargledi.is. Forsala viðburðarins er frá 1. apríl til og með 21. apríl, en þá er miðaverð einungis 3.390 krónur. Aðeins takmarkað miðamagn er í forsölu. Almenn sala hefst að forsölu lokinni og er frá 21. apríl til 10.júní, eða þangað til að selst upp á viðburðinn. Miðaverð í almennri sölu er 4.490 krónur.

Miðasölukerfið felur í sér smá ferli til þess að virkja forráðamenn og auka öryggi sölunnar. Á forsíðunni má finna hlekk þar sem hægt er að kaupa miða. Næst er búið til aðgang og í framhaldinu slegnar inn upplýsingar um miðahafa og forráðamann. Gengið frá greiðslu og frekari upplýsingar birtast þér. Forráðamenn þurfa að staðfesta miðakaupin og er það gert með rafrænum skilríkjum inn á þeirra heimasvæði. Nánari upplýsingar um þetta má finna á forsíðunni.


Um gæslu og öryggi


Gæslufyrirtækið Upp&Niður ehf annast gæslu viðburðarins. Upp&Niður var fengið í verkið vegna góðra umsagna lögreglu og annara aðila sem koma að gæslu. Fyrirtækið er með mikla reynslu í viðburðum ungmenna þar sem allir gæslumenn á þeirra vegum hafa annast þjálfun í aðstæðum sem upp á gætu komið hjá slíkum aldurshóp. Það mun vera einn gæslumaður á hver tuttuguogfimm ungmenni sem sækja viðburðinn, en það er langt fyrir ofan umbeðið magn lögreglu. Þetta er í samræmi við gæslu hjá samtökum félagsmiðstöðva sem og fleiri samtökum sem koma að þessum aldurshóp. Að auki þeirra má finna undanfara björgunarsveita, sjúkraliða, eldvarnarfulltrúa ásamt forvarnarfulltrúa á svæðinu ef einhvað kemur upp á. Einnig má nefna það að lögreglan er á svæðinu, og fylgist með húsnæðinu á meðan viðburði stendur yfir. Vegna mikillar fjölgunar í fyrra hefur einnig verið ákveðið að vera með lækni í húsinu á meðan viðburður stendur yfir.


Leyfi fyrir viðburðinum gefur sýslumaðurinn í Hafnarfirði. Áður en leyfið var veitt var nauðsynlegt að fá góðar umsagnir frá opinberum stofnunum og öðrum aðilum sem sýslumaður sendir á. Þar má nefna Hafnarfjarðarbæ sjálfan, barnaverndarnefnd, heilbrigðiseftirlitið og fleiri aðila. Viðburðurinn hefur verið unninn vel í samráði með fulltrúum Hafnarfjarðarbæjar sem og öðrum fulltrúum. Þar að auki kynnti framkvæmdastjóri samtaka félagsmiðstöðva sér viðburðinn á fyrri árum og kynnti sér aðstæður, sem gaf hátíðinni afar góð viðbrögð og ummæli. Nú á síðustu árum hafa einstakir starfsmenn félagsmiðstöðva annarra bæjarfélaga sótt viðburðinn til að gefa ummæli, sem almennt hafa verið mjög jákvæð. Stefnt er að endurkomu margra slíkra aðila á hátíðina í ár þar sem hátíðarhöldurum þykir mikilvægt að taka verklag slíkra stofnanna til fyrirmyndar og fá ráðleggingar frá þeim, því gott má alltaf bæta. Okkur þykir afar mikilvægt að upplýsingaflæði sé gott til félagsmiðstöðva og annarra bæjarfélaga. Bæjarfélögin standa ekki að hátíðinni en hafa hátíðarhaldarar hafa ráðfært sig við þau varðandi framkvæmd hennar.


Annað varðandi öryggi:


Enginn skal hafa aðgang að húsinu á meðan viðburði stendur yfir. Allir starfsmenn skulu vera vel merktir, og skráðir inn í starfsmannakerfi Sumargleðinnar. Foreldrar og forráðamenn sem vilja koma að hátíðinni, þurfa að vera búnir að skrá sig sem foreldri eða forráðamaður þegar miðahafi staðfestir miðann sinn. Við komu þarf viðkomandi að geta gert grein fyrir sér sem og sínu barni áður en honum er hleypt inn. Sér aðstaða er fyrir foreldra á svæðinu, en vilja foreldrar kíkja á svæði ungmenna, skal það vera í fylgd gæslumanna. Það sama gildir um starfsmenn félagsmiðstöðva sem verða á svæðinu. Þeir eiga að vera búnir að láta vita af komu sinni fyrir viðburð og vera vel merktir á meðan viðburði stendur.


Foreldrar og forráðamenn skulu samþykkja miðakaup


Allir miðahafar skulu hafa samþykki foreldra/forráðarmans til að sækja hátíðina. Staðfest er miðann með því að notast við rafræn skilríki hér á síðunni, inn á heimasvæði forráðamanna. Við viljum hvetja alla þá foreldra sem vilja kynna sér hátíðina nánar, til þess að hafa samband við okkur. Það má bæði gera í gegnum tölvupóst eða í síma. Einnig geta foreldrar haft samband við forvarnarfulltrúa Hafnarfjarðar, Geir Bjarnason, sem hefur gefið hátíðinni afar góða umsögn í gegnum árin. Hann getur einnig bent á fleiri opinbera aðila sem hafa komið að hátíðinni fyrir þá sem vilja hafa samband.

Foreldrar geta komið frítt á viðburðinn. Sér inngangur er fyrir foreldra og forráðamenn, að Sjónarhóli, en sá inngangur er fyrsti inngangurinn sem komið er að frá aðal bílastæði hússins. Foreldrar og forráðamenn hafa þar aðstöðu, þar sem ballið er sjónvarpað á skjá og heitt verður á könnunni. Til þess að foreldri fái aðgang að viðburðinum þarf hann að vera skráður eftir staðfestingu miðahafa, sem foreldri miðahafans. Hann skal geta gert greint fyrir sér með framvísun skilríkis sem og upplýsingar

um sitt barn. Vilji foreldri komast á svæði ungmenna, skal það vera í fylgd gæsluliða.

Engar rútur ganga innan Höfuðborgarsvæðisins:

Engar rútur ganga að né frá viðburðinum á Höfuðborgarsvæðinu. Við hvetjum því foreldra til þess að

fylgja sínu barni á viðburinn, eða að vinahópar hópi sig saman í bíla hjá foreldri einhvers í hópnum.

Vegna mikillar aðsóknar síðustu ára eru rútur í boði frá nærliggjandi bæjarfélögum. Ungmenni skrá

sig í þær þegar miði er keyptur á vefsíðu hátíðarinnar. Nánar tiltekið fara rúturnar frá Selfossi, Hveragerði, Akranesi, Borgarfirði og Reykjanesbæ ásamt stoppum á þeim stöðum sem eru á leið rútanna í bæinn.



Sumargleðin er með öllu áfengis og vímuefnalaus viðburður:


Sumargleðin er með öllu áfengis- og vímuefnalaus viðburður. Sumargleðinni á að standa fyrir jákvæðri skemmtun og upphafi sumarsins, og leggjum við mikla áherslu á að ungmenni vita það fyrir komu. Forvarnarfulltrúi er á staðnum og ef slík mál koma upp, og eru faglærðir einstaklingar sem sinna þeim málum.

Markmið Sumargleðinnar er að fá ungmenni til þess að safnast saman undir öruggi þaki og skemmta sér vel saman. Við hvetjum þig eindregið til þess að koma til okkar og njóta tónleikanna sem verða þeir stærstu hingað til.



Viltu vita meira, ekki hika við að hafa samband!


Hægt er að hafa samband við skipuleggjendur hátíðarinnar með því að fara á vefsíðu Sumargleðinnar,

www.sumargledi.is, og fara þar í flipa sem ber heitið "Hafa samband". Einnig er hægt að hringja

í upplýsinga síma viðburðarins, 666-6997, eða senda tölvupóst á netfangið sumargledi@sumargledi.is. Við

hvetjum foreldra, forráðamenn og aðra eindregið til að hafa samband ef það vakna spurningar um

viðburðinn, ef þær má ekki finna hér á vefsíðunni.